AI ਕੈਮਰਿਆਂ ਨੇ ਕੱਟੇ 39 ਲੱਖ ਟ੍ਰੈਫਿਕ ਚਲਾਨ

 ਨਵੀਂ ਦਿੱਲੀ : ਦਿੱਲੀ ਦੀਆਂ ਸੜਕਾਂ ’ਤੇ ਟ੍ਰੈਫਿਕ ਨਿਯਮ ਤੋੜਨ ਵਾਲਿਆਂ ’ਤੇ ਕੈਮਰਿਆਂ ਦੀ ਨਿਗਰਾਨੀ ਲਗਾਤਾਰ ਵਧ ਰਹੀ ਹੈ। ਇਸ ਸਾਲ 20 ਸਤੰਬਰ ਤੱਕ ਕੈਮਰਿਆਂ ਰਾਹੀਂ ਵੱਖ-ਵੱਖ ਟ੍ਰੈਫਿਕ ਨਿਯਮਾਂ ਦੀ ਉਲੰਘਣਾ ਦੇ 38,95,591 ਚਲਾਨ ਜਾਰੀ ਕੀਤੇ ਗਏ ਹਨ। ਇਨ੍ਹਾਂ ’ਚ ਸਭ ਤੋਂ ਵੱਧ 17,56,160 ਚਲਾਨ ਕਾਰ ਚਾਲਕਾਂ ਦੇ ਹਨ, ਜਦਕਿ ਦੋਪਹੀਆ ਵਾਹਨ ਚਾਲਕ 12,42,653 ਚਲਾਨਾਂ ਨਾਲ ਦੂਜੇ ਸਥਾਨ ’ਤੇ ਹਨ।ਟ੍ਰੈਫਿਕ ਪੁਲਿਸ ਦੇ ਅੰਕੜਿਆਂ ਮੁਤਾਬਕ, ਪਿਛਲੇ ਸਾਲ 20 ਸਤੰਬਰ ਤੱਕ ਕੈਮਰਿਆਂ ਰਾਹੀਂ 37,34,673 ਚਲਾਨ ਜਾਰੀ ਕੀਤੇ ਗਏ ਸਨ। ਇਸ ਸਾਲ ਇਸੇ ਮਿਆਦ ’ਚ ਇਹ ਗਿਣਤੀ ਵਧ ਕੇ 38,95,591 ਹੋ ਗਈ। ਯਾਨੀ ਇੱਕ ਸਾਲ ’ਚ ਕੈਮਰਾ ਆਧਾਰਿਤ ਚਲਾਨਾਂ ਦੀ ਗਿਣਤੀ ’ਚ 1,60,918 ਦਾ ਵਾਧਾ ਹੋਇਆ ਹੈ। ਕੈਮਰਿਆਂ ਰਾਹੀਂ ਚਲਾਨ ਜਾਰੀ ਹੋਣ ਨਾਲ ਨਿਯਮਾਂ ਦੀ ਉਲੰਘਣਾ ’ਤੇ ਨਿਗਰਾਨੀ ਦਾ ਦਾਇਰਾ ਵਧਿਆ ਹੈ। ਮੁੱਖ ਮਾਰਗਾਂ, ਚੌਰਾਹਿਆਂ ਤੇ ਸੰਵੇਦਨਸ਼ੀਲ ਥਾਵਾਂ ’ਤੇ ਪੁਲਿਸ ਮੁਲਾਜ਼ਮ ਦੀ ਮੌਕੇ ’ਤੇ ਮੌਜੂਦਗੀ ਤੋਂ ਬਿਨਾਂ ਵੀ ਵਾਹਨਾਂ ਦੀ ਪਛਾਣ ਕਰਕੇ ਕਾਰਵਾਈ ਕੀਤੀ ਜਾ ਰਹੀ ਹੈ।20 ਸਤੰਬਰ ਤੱਕ ਕੈਮਰਿਆਂ ਰਾਹੀਂ ਜਾਰੀ ਕੀਤੇ ਗਏ ਚਲਾਨਾਂ ’ਚ ਕਾਰ ਚਾਲਕ ਸਭ ਤੋਂ ਅੱਗੇ ਰਹੇ। ਇਸ ਤੋਂ ਬਾਅਦ ਦੋਪਹੀਆ ਵਾਹਨ ਚਾਲਕਾਂ ਦਾ ਨੰਬਰ ਹੈ। ਉੱਥੇ ਹੀ ਟੈਕਸੀਆਂ ਦੇ 5,22,668, ਹਲਕੇ ਮਾਲਵਾਹਕ ਵਾਹਨਾਂ ਦੇ 1,34,856 ਤੇ ਤਿੰਨ ਪਹੀਆ ਵਾਹਨਾਂ ਦੇ 80,097 ਚਲਾਨ ਜਾਰੀ ਕੀਤੇ ਗਏ।