ਟਿਕਟ ਹੈ ਫਿਰ ਵੀ ਬਿਨਾਂ ਟਿਕਟ ਮੰਨੇ ਜਾਣਗੇ ਯਾਤਰੀ!

 ਪਟਨਾ: ਰੇਲਵੇ ਵੱਲੋਂ 1 ਅਕਤੂਬਰ ਤੋਂ 31 ਅਕਤੂਬਰ ਤੱਕ ਦੇਸ਼ ਭਰ ਵਿੱਚ ਵਿਸ਼ੇਸ਼ ਟਿਕਟ ਜਾਂਚ ਮੁਹਿੰਮ ਚਲਾਈ ਜਾਵੇਗੀ। ਇਸ ਦੌਰਾਨ ਟਿਕਟ ਦੀ ਪ੍ਰਮਾਣਿਕਤਾ ਦੇ ਨਾਲ-ਨਾਲ ਰਿਆਇਤੀ ਕਿਰਾਏ, ਵਿਸ਼ੇਸ਼ ਰਿਜ਼ਰਵੇਸ਼ਨ ਕੋਟੇ ਅਤੇ ਈ-ਪਾਸ/ਪੀਟੀਓ ਦੀ ਦੁਰਵਰਤੋਂ ਦੀ ਵੀ ਜਾਂਚ ਕੀਤੀ ਜਾਵੇਗੀ।

ਰੇਲਵੇ ਬੋਰਡ ਨੇ ਸਾਰੇ ਜ਼ੋਨਲ ਰੇਲਵੇ ਦੇ ਪ੍ਰਿੰਸੀਪਲ ਚੀਫ ਕਮਰਸ਼ੀਅਲ ਮੈਨੇਜਰਾਂ ਨੂੰ ਇਸ ਅਭਿਆਨ ਸਬੰਧੀ ਨਿਰਦੇਸ਼ ਜਾਰੀ ਕੀਤੇ ਹਨ। ਰੇਲਵੇ ਬੋਰਡ ਨੇ ਇਸ ਸਬੰਧੀ 25 ਸਤੰਬਰ ਨੂੰ ਪੱਤਰ ਜਾਰੀ ਕੀਤਾ ਹੈ।

ਪੱਤਰ ਮੁਤਾਬਕ ਟਿਕਟ ਜਾਂਚ ਕਰਮਚਾਰੀਆਂ ਨੂੰ ਖ਼ਾਸ ਤੌਰ ’ਤੇ ਇਹ ਜਾਂਚ ਕਰਨੀ ਹੋਵੇਗੀ ਕਿ ਯਾਤਰੀ ਜਿਸ ਰਿਆਇਤ ਜਾਂ ਰਿਜ਼ਰਵੇਸ਼ਨ ਕੋਟੇ ਤਹਿਤ ਟਿਕਟ ਲੈ ਕੇ ਯਾਤਰਾ ਕਰ ਰਿਹਾ ਹੈ, ਕੀ ਉਹ ਇਸ ਲਈ ਯੋਗ ਹੈ ਜਾਂ ਨਹੀਂ। ਇਸ ਲਈ ਨਿਰਧਾਰਤ ਅਸਲ ਪਛਾਣ ਪ੍ਰਮਾਣ ਪੱਤਰ ਦੇਖਣਾ ਲਾਜ਼ਮੀ ਹੋਵੇਗਾ।ਰਿਜ਼ਰਵ ਟਿਕਟ ’ਤੇ ਯਾਤਰਾ ਕਰ ਰਹੇ ਯਾਤਰੀਆਂ ਵਿੱਚੋਂ ਘੱਟੋ-ਘੱਟ ਇੱਕ ਯਾਤਰੀ ਕੋਲ ਨਿਰਧਾਰਤ ਅਸਲ ਪਛਾਣ ਪੱਤਰ ਹੋਣਾ ਲਾਜ਼ਮੀ ਹੋਵੇਗਾ। ਜੇਕਰ ਅਜਿਹਾ ਨਹੀਂ ਪਾਇਆ ਜਾਂਦਾ ਤਾਂ ਉਸ ਟਿਕਟ ’ਤੇ ਯਾਤਰਾ ਕਰ ਰਹੇ ਸਾਰੇ ਯਾਤਰੀਆਂ ਨੂੰ ਬਿਨਾਂ ਟਿਕਟ ਯਾਤਰਾ ਕਰਨ ਵਾਲਾ ਮੰਨਿਆ ਜਾਵੇਗਾ।

ਉੱਥੇ ਹੀ ਕਿਸੇ ਵਿਸ਼ੇਸ਼ ਰਿਆਇਤ ਜਾਂ ਰਿਜ਼ਰਵੇਸ਼ਨ ਕੋਟੇ ਤਹਿਤ ਬੁੱਕ ਕੀਤੀ ਟਿਕਟ ਦੇ ਮਾਮਲੇ ਵਿੱਚ ਸਬੰਧਤ ਯਾਤਰੀ ਨੂੰ ਆਪਣੀ ਯੋਗਤਾ ਸਾਬਤ ਕਰਨ ਲਈ ਨਿਰਧਾਰਤ ਅਸਲ ਪਛਾਣ ਪੱਤਰ ਪੇਸ਼ ਕਰਨਾ ਹੋਵੇਗਾ।