ਮੀਟਿੰਗ ‘ਚ ਬੱਸ ਚਾਹ ਚੰਗੀ ਸੀ

ਜੰਮੂ। ਲੱਦਾਖ ਦੇ ਮੁੱਦਿਆਂ ਨੂੰ ਲੈ ਕੇ ਕੇਂਦਰ ਨਾਲ ਹਾਲ ਹੀ ਵਿੱਚ ਹੋਈ ਬੈਠਕ ‘ਤੇ ਵਾਤਾਵਰਣ ਪ੍ਰੇਮੀ ਅਤੇ ਸਿੱਖਿਆ ਸ਼ਾਸਤਰੀ ਸੋਨਮ ਵਾਂਗਚੁਕ ਨੇ ਨਿਰਾਸ਼ਾ ਪ੍ਰਗਟਾਈ ਹੈ। ਸੋਸ਼ਲ ਮੀਡੀਆ ਦੇ ਐਕਸ (X) ਪਲੇਟਫਾਰਮ ‘ਤੇ ਇੱਕ ਵੀਡੀਓ ਪੋਸਟ ਕਰਦੇ ਹੋਏ ਉਨ੍ਹਾਂ ਨੇ ਮੀਟਿੰਗ ਨੂੰ ਲੈ ਕੇ ਤਨਜ਼ ਕੱਸਿਆ ਅਤੇ ਮਾਰਚ ਦਾ ਐਲਾਨ ਕੀਤਾ। ਉਨ੍ਹਾਂ ਕਿਹਾ ਕਿ ਲੱਦਾਖ ਦੇ ਮੁੱਦਿਆਂ ਨੂੰ ਲੈ ਕੇ ਉਹ ਕੇਂਦਰ ਦਾ ਭਰੋਸਾ ਚਾਹੁੰਦੇ ਹਨ।

ਐਕਸ ਪਲੇਟਫਾਰਮ ‘ਤੇ ਇੱਕ ਵੀਡੀਓ ਪੋਸਟ ਸ਼ੇਅਰ ਕਰਦੇ ਹੋਏ ਉਨ੍ਹਾਂ ਕਿਹਾ ਕਿ ਹੈਲੋ ਦੋਸਤੋ… ਇਸ ਸਮੇਂ ਮੈਂ ਦਿੱਲੀ ਵਿੱਚ ਹਾਂ। ਇਹ ਉਹੀ ਥਾਂ ਹੈ ਜਿੱਥੇ (ਜੰਤਰ-ਮੰਤਰ) ਅਸੀਂ ਭੁੱਖੇ ਰਹਿ ਕੇ ਕਈ ਹਫ਼ਤੇ ਬਿਤਾਏ। ਅਸੀਂ ਇੱਥੇ ਲੱਦਾਖ ਦੇ ਮੁੱਦਿਆਂ ਨੂੰ ਲੈ ਕੇ ਗ੍ਰਹਿ ਮੰਤਰਾਲੇ ਨਾਲ ਬੈਠਕ ਕਰਨ ਆਏ ਸੀ ਪਰ ਇਸ ਦਾ ਕੋਈ ਸਿੱਟਾ ਨਹੀਂ ਨਿਕਲਿਆ।

ਜਸਪਾਲ ਭੱਟੀ ਦੇ ਸ਼ੋਅ ਨਾਲ ਜੁੜੀ ਇੱਕ ਕਲਿੱਪ ਸ਼ੇਅਰ ਕਰਦੇ ਹੋਏ ਉਨ੍ਹਾਂ ਕਿਹਾ ਕਿ ਬੈਠਕ ਵਿੱਚ ਬੱਸ ਚਾਹ ਹੀ ਚੰਗੀ ਸੀ। ਬੈਠਕ ਹੁਣ ਅਗਲੇ ਮਹੀਨੇ ਹੋਵੇਗੀ।ਸੋਨਮ ਵਾਂਗਚੁਕ ਨੇ ਕਿਹਾ ਕਿ ਲੱਦਾਖੀਆਂ ਦੀਆਂ ਕਈ ਮੰਗਾਂ ਹਨ, ਜਿਵੇਂ ਇੱਥੇ ਇੱਕ ਲੋਕਤੰਤਰੀ ਢਾਂਚਾ ਬਣਾਇਆ ਜਾਵੇ। ਵਿਧਾਨ ਸਭਾ ਦਾ ਗਠਨ ਹੋਵੇ ਤਾਂ ਜੋ ਸਥਾਨਕ ਲੋਕ ਫ਼ੈਸਲੇ ਲੈ ਸਕਣ। ਜ਼ਮੀਨ ਅਤੇ ਵਾਤਾਵਰਣ ਆਦਿ ਨੂੰ ਲੈ ਕੇ ਇੱਥੋਂ ਦੇ ਲੋਕ ਸੁਤੰਤਰ ਫ਼ੈਸਲੇ ਲੈ ਸਕਣ। ਸੋਨਮ ਵਾਂਗਚੁਕ ਨੇ ਕਿਹਾ ਕਿ ਸਾਨੂੰ ਸਰਕਾਰ ਤੋਂ ਸਿਰਫ਼ ਇੱਕ ਜਾਇਜ਼ ਭਰੋਸਾ ਦੀ ਉਮੀਦ ਸੀ, ਜੋ ਸਾਨੂੰ ਨਹੀਂ ਦਿੱਤਾ ਗਿਆ।ਸੋਨਮ ਵਾਂਗਚੁਕ ਨੇ ਲੋਕਾਂ ਨੂੰ ਅਪੀਲ ਕਰਦਿਆਂ ਕਿਹਾ ਕਿ ਇਸ ਲਈ ਅਸੀਂ ਚਾਹੁੰਦੇ ਹਾਂ ਕਿ ਤੁਸੀਂ ਸਾਡੀ ਮਦਦ ਲਈ ਅੱਗੇ ਆਓ। ਅਸੀਂ 19 ਤੋਂ 24 ਸਤੰਬਰ ਦੇ ਵਿਚਕਾਰ ਲੱਦਾਖ ਵਿੱਚ ਇੱਕ ਵੱਡਾ ਮਾਰਚ ਕਰ ਰਹੇ ਹਾਂ।

ਇਸ ਦੌਰਾਨ ਜੇਕਰ ਕੇਂਦਰ ਦਾ ਭਰੋਸਾ ਆ ਜਾਂਦਾ ਹੈ ਤਾਂ ਅਸੀਂ ਇਸ ਮਾਰਚ ਨੂੰ ਲੱਦਾਖ ਦੇ ਸ਼ਹੀਦਾਂ ਦੀ ਯਾਦ ਵਜੋਂ ਰੱਖਾਂਗੇ। ਜੇਕਰ ਇਸ ਦੌਰਾਨ ਵੀ ਕੇਂਦਰ ਕੋਈ ਪ੍ਰਤੀਕਿਰਿਆ ਨਹੀਂ ਦਿੰਦਾ ਤਾਂ ਅਸੀਂ ਇੱਕ ਵੱਡਾ ਪ੍ਰਦਰਸ਼ਨ ਕਰਾਂਗੇ।ਦੱਸ ਦੇਈਏ ਕਿ ਬੁੱਧਵਾਰ ਨੂੰ ਕੇਂਦਰ ਸਰਕਾਰ ਨੇ ਲੱਦਾਖ ਦੇ ਸਥਾਨਕ ਸੰਗਠਨਾਂ ਨਾਲ ਬੈਠਕ ਕੀਤੀ ਸੀ। ਇਸ ਮੀਟਿੰਗ ਵਿੱਚ ਕੇਂਦਰ ਨੇ ਲੱਦਾਖ ਨੂੰ ਰਾਜ ਜਾਂ ਵਿਧਾਨ ਸਭਾ ਵਾਲਾ ਕੇਂਦਰ ਸ਼ਾਸਤ ਪ੍ਰਦੇਸ਼ ਬਣਾਉਣ ਤੋਂ ਫਿਲਹਾਲ ਇਨਕਾਰ ਕਰ ਦਿੱਤਾ।

ਕੇਂਦਰੀ ਗ੍ਰਹਿ ਮੰਤਰਾਲੇ ਨੇ ਲੱਦਾਖ ਦੇ ਨੇਤਾਵਾਂ ਨੂੰ ਧਾਰਾ 371 ਦੇ ਡਰਾਫ਼ਟ ਤੋਂ ਪਹਿਲਾਂ ਲੱਦਾਖ ਦੇ ਪ੍ਰਸਤਾਵਿਤ ਸਿਆਸੀ ਢਾਂਚੇ ਨਾਲ ਸਬੰਧਤ 8 ਤੋਂ 10 ਮੁੱਖ ਮੁੱਦਿਆਂ ‘ਤੇ ਵਿਚਾਰ ਕਰਨ ਅਤੇ ਸਿੱਟੇ ‘ਤੇ ਪਹੁੰਚਣ ਲਈ ਕਿਹਾ ਸੀ। ਕੇਂਦਰ ਅਤੇ ਲੱਦਾਖ ਦੀ ਲੀਡਰਸ਼ਿਪ ਨੇ ਇੱਕ ਅਜਿਹੇ ਵਿਲੱਖਣ ਮਾਡਲ ‘ਤੇ ਕੰਮ ਕਰਨ ‘ਤੇ ਸਹਿਮਤੀ ਜਤਾਈ ਹੈ ਜੋ ਇੱਕ ਚੁਣੀ ਹੋਈ ਸੰਸਥਾ ਨੂੰ ਵਿਧਾਇਕ, ਕਾਰਜਕਾਰੀ ਅਤੇ ਵਿੱਤੀ ਸ਼ਕਤੀਆਂ ਪ੍ਰਦਾਨ ਕਰੇ।