ਚੱਲਦੀ ਸਕੂਟੀ ਬਣੀ ਅੱਗ ਦਾ ਗੋਲਾ

 ਹੁਸ਼ਿਆਰਪੁਰ ਦੇ ਦਸੂਹਾ ਨੇੜੇ ਉੱਚੀ ਬੱਸੀ ਵਿਖੇ ਵੀਰਵਾਰ ਸਵੇਰੇ ਕਰੀਬ ਸਵਾ ਦਸ ਵਜੇ ਉਸ ਸਮੇਂ ਤਰਥੱਲੀ ਮਚ ਗਈ, ਜਦੋਂ ਸੜਕ ‘ਤੇ ਚੱਲ ਰਹੀ ਇੱਕ ਸਕੂਟੀ ਨੂੰ ਅਚਾਨਕ ਅੱਗ ਲੱਗ ਗਈ। ਸਕੂਟੀ ‘ਚੋਂ ਧੂੰਆਂ ਨਿਕਲਦਾ ਦੇਖ ਸਕੂਟੀ ਚਾਲਕ ਅਰੁਣ ਕੁਮਾਰ ਨੇ ਸਮਝਦਾਰੀ ਦਿਖਾਉਂਦੇ ਹੋਏ ਤੁਰੰਤ ਵਾਹਨ ਸੜਕ ਕਿਨਾਰੇ ਰੋਕ ਦਿੱਤਾ ਅਤੇ ਉਸ ਤੋਂ ਦੂਰ ਹਟ ਗਿਆ। ਇਸ ਨਾਲ ਉਸ ਦੀ ਜਾਨ ਬਚ ਗਈ। ਹਾਦਸੇ ’ਚ ਕਿਸੇ ਦੇ ਜ਼ਖ਼ਮੀ ਹੋਣ ਦੀ ਖ਼ਬਰ ਨਹੀਂ ਹੈ।

ਜਾਣਕਾਰੀ ਅਨੁਸਾਰ ਪਿੰਡ ਲਮੀਨ ਦਾ ਰਹਿਣ ਵਾਲਾ ਅਰੁਣ ਕੁਮਾਰ ਦਸੂਹਾ ਦੇ ਇੱਕ ਮੈਡੀਕਲ ਸਟੋਰ ‘ਤੇ ਕੰਮ ਕਰਦਾ ਹੈ। ਉਹ ਵੀਰਵਾਰ ਸਵੇਰੇ ਸਕੂਟੀ ‘ਤੇ ਕੰਮ ਲਈ ਜਾ ਰਿਹਾ ਸੀ। ਉੱਚੀ ਬੱਸੀ ਕੋਲ ਪਹੁੰਚਦਿਆਂ ਹੀ ਅਚਾਨਕ ਉਸ ਦੀ ਸਕੂਟੀ ‘ਚੋਂ ਧੂੰਆਂ ਨਿਕਲਣ ਲੱਗਾ। ਉਹ ਕੁਝ ਸਮਝ ਪਾਉਂਦਾ, ਇਸ ਤੋਂ ਪਹਿਲਾਂ ਹੀ ਸਕੂਟੀ ਨੂੰ ਅੱਗ ਲੱਗ ਗਈ।

ਅੱਗ ਲੱਗਦੇ ਹੀ ਅਰੁਣ ਕੁਮਾਰ ਨੇ ਤੁਰੰਤ ਸਕੂਟੀ ਰੋਕ ਦਿੱਤੀ ਅਤੇ ਉਸ ਤੋਂ ਛਾਲ ਮਾਰ ਕੇ ਦੂਰ ਚਲਾ ਗਿਆ। ਦੇਖਦੇ ਹੀ ਦੇਖਦੇ ਅੱਗ ਨੇ ਸਕੂਟੀ ਦੇ ਵੱਡੇ ਹਿੱਸੇ ਨੂੰ ਆਪਣੀ ਲਪੇਟ ਵਿੱਚ ਲੈ ਲਿਆ। ਸੜਕ ‘ਤੇ ਸਕੂਟੀ ਨੂੰ ਅੱਗ ਲੱਗੀ ਦੇਖ ਕੇ ਆਸ-ਪਾਸ ਦੇ ਲੋਕ ਵੀ ਮੌਕੇ ‘ਤੇ ਇਕੱਠੇ ਹੋ ਗਏ। ਲੋਕਾਂ ਨੇ ਅੱਗ ‘ਤੇ ਕਾਬੂ ਪਾਉਣ ਦੀ ਕੋਸ਼ਿਸ਼ ਕੀਤੀ।

ਅਰੁਣ ਕੁਮਾਰ ਨੇ ਦੱਸਿਆ ਕਿ ਸਕੂਟੀ ਬਿਲਕੁਲ ਠੀਕ ਚੱਲ ਰਹੀ ਸੀ ਅਤੇ ਉਸ ਵਿੱਚ ਕਿਸੇ ਕਿਸਮ ਦੀ ਖਰਾਬੀ ਮਹਿਸੂਸ ਨਹੀਂ ਹੋਈ ਸੀ। ਅਚਾਨਕ ਧੂੰਆਂ ਨਿਕਲਣ ਤੋਂ ਬਾਅਦ ਅੱਗ ਭੜਕਣ ਨਾਲ ਉਹ ਵੀ ਹੈਰਾਨ ਰਹਿ ਗਿਆ। ਸਮਾਂ ਰਹਿੰਦੇ ਵਾਹਨ ਤੋਂ ਦੂਰ ਹੋਣ ਕਰਕੇ ਵੱਡਾ ਹਾਦਸਾ ਟਲ ਗਿਆ।

ਘਟਨਾ ਤੋਂ ਬਾਅਦ ਸਥਾਨਕ ਲੋਕਾਂ ਵਿੱਚ ਵੀ ਚਰਚਾ ਰਹੀ ਕਿ ਆਖ਼ਰ ਚੱਲਦੀ ਸਕੂਟੀ ਨੂੰ ਅਚਾਨਕ ਅੱਗ ਕਿਵੇਂ ਲੱਗੀ। ਫਿਲਹਾਲ ਅੱਗ ਲੱਗਣ ਦੇ ਕਾਰਨਾਂ ਦਾ ਪਤਾ ਨਹੀਂ ਲੱਗ ਸਕਿਆ ਹੈ। ਸ਼ੁਰੂਆਤੀ ਤੌਰ ‘ਤੇ ਵਾਇਰਿੰਗ ਵਿੱਚ ਖਰਾਬੀ ਜਾਂ ਵਾਹਨ ਦੇ ਕਿਸੇ ਤਕਨੀਕੀ ਹਿੱਸੇ ਵਿੱਚ ਦਿੱਕਤ ਨੂੰ ਸੰਭਾਵੀ ਕਾਰਨ ਮੰਨਿਆ ਜਾ ਰਹਾ ਹੈ, ਹਾਲਾਂਕਿ ਇਸ ਦੀ ਪੁਸ਼ਟੀ ਜਾਂਚ ਤੋਂ ਬਾਅਦ ਹੀ ਹੋਵੇਗੀ।

ਜਿਸ ਸਮੇਂ ਸਕੂਟੀ ਨੂੰ ਅੱਗ ਲੱਗੀ, ਉਸ ਸਮੇਂ ਅਰੁਣ ਕੁਮਾਰ ਨੇ ਬਿਨਾਂ ਦੇਰੀ ਕੀਤੇ ਖ਼ੁਦ ਨੂੰ ਵਾਹਨ ਤੋਂ ਵੱਖ ਕਰ ਲਿਆ। ਜੇਕਰ ਅੱਗ ਦਾ ਪਤਾ ਲੱਗਣ ਵਿੱਚ ਕੁੱਝ ਹੋਰ ਦੇਰੀ ਹੋ ਜਾਂਦੀ ਤਾਂ ਹਾਦਸਾ ਗੰਭੀਰ ਹੋ ਸਕਦਾ ਸੀ। ਘਟਨਾ ਕਰਕੇ ਕੁਝ ਸਮੇਂ ਲਈ ਸੜਕ ‘ਤੇ ਹਫੜਾ-ਦਫੜੀ ਦਾ ਮਾਹੌਲ ਬਣਿਆ ਰਿਹਾ।

ਸਥਾਨਕ ਲੋਕਾਂ ਨੇ ਵਾਹਨ ਚਾਲਕਾਂ ਨੂੰ ਸਮੇਂ-ਸਮੇਂ ‘ਤੇ ਸਕੂਟੀ ਦੀ ਸਰਵਿਸ, ਵਾਇਰਿੰਗ ਅਤੇ ਹੋਰ ਤਕਨੀਕੀ ਹਿੱਸਿਆਂ ਦੀ ਜਾਂਚ ਕਰਵਾਉਣ ਦੀ ਅਪੀਲ ਕੀਤੀ ਹੈ। ਫਿਲਹਾਲ ਘਟਨਾ ’ਚ ਕਿਸੇ ਤਰ੍ਹਾਂ ਦੇ ਜਾਨੀ ਨੁਕਸਾਨ ਤੋਂ ਬਚਾਅ ਰਿਹਾ।