ਜ਼ੋਮੈਟੋ ਦਾ ਗਾਹਕਾਂ ਦੀ ਸਿਹਤ ਨੂੰ ਲੈ ਕੇ ਵੱਡਾ ਫੈਸਲਾ, ਐਨਾਲੌਗ ਚੀਜ਼ ਸਮੇਤ ਪਲੇਟਫਾਰਮ ਤੋਂ ਹਟਾਏ ਅਜਿਹੇ ਪ੍ਰੋਡਕਟਸ

ਨਵੀਂ ਦਿੱਲੀ : ਆਨਲਾਈਨ ਆਰਡਰ ’ਤੇ ਖਾਣ-ਪੀਣ ਦੀਆਂ ਚੀਜ਼ਾਂ ਦੀ ਸਪਲਾਈ ਕਰਨ ਵਾਲੇ ਪਲੇਟਫਾਰਮ Zomato ਨੇ ਸੋਮਵਾਰ ਨੂੰ ਆਪਣੇ ਪਲੇਟਫਾਰਮ ’ਤੇ ਸੂਚੀਬੱਧ ਰੈਸਟੋਰੈਂਟਾਂ ਵੱਲੋਂ ‘ਐਨਾਲਾਗ’ ਚੀਜ਼, ਪਨੀਰ ਜਾਂ ਹੋਰ ਦੁੱਧ ਤੋਂ ਬਣੇ ਉਤਪਾਦਾਂ ਨਾਲ ਤਿਆਰ ਕੀਤੇ ਪਕਵਾਨਾਂ ਦੀ ਵਿਕਰੀ ਨੂੰ ਬਿਲਕੁਲ ਬਰਦਾਸ਼ਤ ਨਾ ਕਰਨ ਦੀ ਨੀਤੀ ਦਾ ਐਲਾਨ ਕੀਤਾ ਹੈ। ਕੰਪਨੀ ਨੇ ਕਿਹਾ ਕਿ ਨਿਯਮਾਂ ਦੀ ਪਾਲਣਾ ਨਾ ਕਰਨ ਵਾਲੇ ਰੈਸਟੋਰੈਂਟਾਂ ਨੂੰ ਉਹ ਆਪਣੇ ਪਲੇਟਫਾਰਮ ਤੋਂ ਹਟਾਉਣ ਦਾ ਅਧਿਕਾਰ ਰੱਖਦੀ ਹੈ।

‘ਐਨਾਲੌਗ’ ਪਕਵਾਨਾਂ ’ਚ ਰਵਾਇਤੀ ਸਮੱਗਰੀ ਦੀ ਥਾਂ ਸਸਤੇ ਜਾਂ ਬਦਲਵੇਂ ਪਦਾਰਥਾਂ ਦੀ ਵਰਤੋਂ ਕੀਤੀ ਜਾਂਦੀ ਹੈ। ਜਿਵੇਂ ਅਸਲੀ ਦੁੱਧ ਜਾਂ ਚੀਜ਼ ਦੀ ਥਾਂ ਬਨਸਪਤੀ ਤੇਲਾਂ ਦੀ ਵਰਤੋਂ ਕੀਤੀ ਜਾਂਦੀ ਹੈ, ਜਦਕਿ ਉਨ੍ਹਾਂ ਦੀ ਦਿੱਖ ਅਤੇ ਬਣਤਰ ਰਵਾਇਤੀ ਉਤਪਾਦਾਂ ਵਰਗੀ ਹੀ ਰੱਖੀ ਜਾਂਦੀ ਹੈ। ਇਹ ਕਦਮ ਮਹਾਰਾਸ਼ਟਰ ’ਚ ਖੁਰਾਕ ਤੇ ਦਵਾਈ ਪ੍ਰਸ਼ਾਸਨ ਵੱਲੋਂ ਸੂਬੇ ਭਰ ’ਚ ਕਾਰਵਾਈ ਕੀਤੇ ਜਾਣ ਅਤੇ ਦਿੱਲੀ ਦੇ ਪੰਜ-ਤਾਰਾ ਹੋਟਲਾਂ ’ਚ ਭਾਰਤੀ ਖੁਰਾਕ ਸੁਰੱਖਿਆ ਅਤੇ ਮਿਆਰ ਅਥਾਰਟੀ (FSSAI) ਵੱਲੋਂ ਜਾਂਚ ਕੀਤੇ ਜਾਣ ਦੀਆਂ ਖ਼ਬਰਾਂ ਦਰਮਿਆਨ ਖੁਰਾਕ ਸੁਰੱਖਿਆ ’ਤੇ ਮੁੜ ਵਧੇ ਧਿਆਨ ਦੇ ਪਿਛੋਕੜ ’ਚ ਚੁੱਕਿਆ ਗਿਆ ਹੈ।

ਜ਼ੋਮੈਟੋ ਨੇ ਕਿਹਾ ਕਿ ਤੁਰੰਤ ਪ੍ਰਭਾਵ ਨਾਲ ਉਹ ਪਕਵਾਨ ਉਸ ਦੇ ਪਲੇਟਫਾਰਮ ਤੋਂ ਹਟਾ ਦਿੱਤੇ ਗਏ ਹਨ, ਜਿਨ੍ਹਾਂ ਬਾਰੇ ਰੈਸਟੋਰੈਂਟ ਭਾਈਵਾਲਾਂ ਨੇ ਦੱਸਿਆ ਸੀ ਕਿ ਉਨ੍ਹਾਂ ’ਚ ‘ਐਨਾਲੌਗ ਡੇਅਰੀ’ ਉਤਪਾਦਾਂ ਦੀ ਵਰਤੋਂ ਕੀਤੀ ਗਈ ਹੈ। ਕੰਪਨੀ ਨੇ ਕਿਹਾ ਕਿ ਨਿਯਮਾਂ ਦੀ ਪਾਲਣਾ ਨਾ ਕਰਨ ਵਾਲੇ ਰੈਸਟੋਰੈਂਟਾਂ ਨੂੰ ਪਲੇਟਫਾਰਮ ਤੋਂ ਹਟਾ ਦਿੱਤਾ ਜਾਵੇਗਾ।

ਜ਼ੋਮੈਟੋ ਨੇ ਸੋਮਵਾਰ ਨੂੰ ਆਪਣੇ ਪਲੇਟਫਾਰਮ ’ਤੇ ਸੂਚੀਬੱਧ ਕਾਰੋਬਾਰੀਆਂ ਨੂੰ ਭੇਜੇ ਸੰਦੇਸ਼ ’ਚ ਕਿਹਾ, ‘ਸਾਡੀ ਤਰਜੀਹ ਇਹ ਯਕੀਨੀ ਬਣਾਉਣਾ ਹੈ ਕਿ ਗਾਹਕਾਂ ਨੂੰ ਅਜਿਹਾ ਭੋਜਨ ਮਿਲੇ, ਜਿਸ ਦਾ ਸਹੀ ਵੇਰਵਾ ਦਿੱਤਾ ਗਿਆ ਹੋਵੇ, ਜੋ ਸੁਰੱਖਿਅਤ ਹੋਵੇ ਅਤੇ ਉਮੀਦ ਕੀਤੇ ਗੁਣਵੱਤਾ ਮਾਪਦੰਡਾਂ ’ਤੇ ਖਰਾ ਉਤਰਦਾ ਹੋਵੇ। ਇਸ ਤਹਿਤ ਅਸੀਂ ਆਪਣੇ ਪਲੇਟਫਾਰਮ ’ਤੇ ‘ਐਨਾਲੌਗ’ ਚੀਜ਼, ਪਨੀਰ ਤੇ ਹੋਰ ਅਜਿਹੇ ਦੁੱਧ ਉਤਪਾਦਾਂ ਵਾਲੇ ਖੁਰਾਕੀ ਪਦਾਰਥਾਂ ਦੀ ਸੂਚੀਬੱਧਤਾ ਅਤੇ ਸਪਲਾਈ ਨੂੰ ਲੈ ਕੇ ਬਿਲਕੁਲ ਬਰਦਾਸ਼ਤ ਨਾ ਕਰਨ ਦੀ ਨੀਤੀ ਲਾਗੂ ਕਰ ਰਹੇ ਹਾਂ।’

ਫੂਡ ਡਿਲਿਵਰੀ ਪਲੇਟਫਾਰਮ ਨੇ ਕਿਹਾ ਕਿ ਇਹ ਪਹਿਲ ਖੁਰਾਕ ਸੁਰੱਖਿਆ ਅਤੇ ਰੈਗੂਲੇਟਰੀ ਲੋੜਾਂ ਦੇ ਅਨੁਕੂਲ ਖਪਤਕਾਰਾਂ ਲਈ ਪਾਰਦਰਸ਼ਤਾ ਤੇ ਖੁਰਾਕ ਦੀ ਗੁਣਵੱਤਾ ਨੂੰ ਮਜ਼ਬੂਤ ਕਰਨ ਲਈ ਕੀਤੀ ਜਾ ਰਹੀ ਹੈ। ਜ਼ੋਮੈਟੋ ਨੇ ਕਿਹਾ, ‘ਜਿਨ੍ਹਾਂ ਰੈਸਟੋਰੈਂਟਾਂ ਨੇ ਪਹਿਲਾਂ ਹੀ ਆਪਣੇ ਮੀਨੂ ’ਚ ‘ਐਨਾਲੌਗ’ ਚੀਜ਼ ਅਤੇ ਪਨੀਰ ਜਾਂ ਹੋਰ ਅਜਿਹੇ ਦੁੱਧ ਉਤਪਾਦਾਂ ਦੀ ਵਰਤੋਂ ਦਾ ਐਲਾਨ ਕੀਤਾ ਹੈ, ਅਜਿਹੇ ਪਕਵਾਨਾਂ ਨੂੰ ਤੁਰੰਤ ਪ੍ਰਭਾਵ ਨਾਲ ਪਲੇਟਫਾਰਮ ਤੋਂ ਹਟਾ ਦਿੱਤਾ ਜਾਵੇਗਾ।’